Seni Buhun bag 2

VCD Pantun Henteu Payu
  AYA nu haat hayang ngadokumentasikeun pantun kana jenis VCD, tapi teu bogaeun waragad. Ongkoh geus dicoba “dibisniskeun”, ngan masarakatna loba nu geus teu hayang malire.

GEUS aya sababaraha tarekah sangkan rupa-rupa kasenian buhun ti Sunda dipertahankeun, atawa sakurang-kurangna didokumentasikeun sangkan ulah leungit. Saperti seni pantun contona. Taun 1970-an Ajip Rosidi, budayawan, geus ngadokumentasikeun rupa-rupa carita ti rupa-rupa juru pantun nu aya di tatar Sunda malah ti Banten. Carita pantun dicatet tinulis sebab salila ieu carita pantun ukur ditalar ku masing-masing juru pantun, euweuh catetan tinulis. Lamun hiji waktu juru pantun maot, carita pantun ge tangtu kabawa maot. Kumaha saterusna eta proyek ngadokumentasikeun carita pantun, naha aya bukuna, tur bisa kapanggih di unggal perpustakaan atawa toko buku, masarakat umum teu loba anu nyaho.
Taun 2005 Aan Merdeka Permana, pangarang Sunda sacara pribadi ihtiar ngadokumentasikeun pantun kana jenis VCD.
“Pantun mah lain pintonan anu nembongkeun hal-hal nu atraktif. Lain keur lalajoaneun tapi keur dibandungan da apanan carita teh ukur didongengkeun ku juru pantun. Wayang onaman aya mediana. Ngan kuring ngahaja ngadokumentasikeun dina wangun CVD sabab entragan ngora loba anu teu apal, naon ari pantun?” ceuk Aan harita.
Yen aya usaha-usaha seni pantun direkam, tangtu lain pagawean Aan sorangan, da lian ti Ajip Rosidi anu ngadokumentasikeun/nyatetkeun carita pantun, seni pantun ge kungsi dijieun dina wangun kaset. Taun 1980-an Juru Pantun Aceng Tamadipura urang Sumedang geus dikasetkeun. Ngan boa ukur manehna wungkul anu “boga prestasi” didokumentasikeun dina wangun alat modern teh, da juru pantun sejenna mah, teu kungsi. Aceng mah kasetna kungsi aya dijual di toko kaset. Ngan mana produserna teu neruskeun nyieunan kaset pantun ge, meureun sacara bisnis teu nguntungkeun. Mangkaning harita mah anu keur rame teh kaset dangdut jeung pop Sunda.
Aan boga teori, hiji waktu, suku seler mana bae di dunya, bakal hayang apal kana pakaya budayana sorangan. Boh kana senina, boh kana sajarahna atawa kana hal-hal sejen anu jadi ciri hasna. Jadi ceuk Aan, urang Sunda anu geus lila ninggalkeun kasundaan ku sabab serab mireungeuh kamonesan anu jolna ti deungeun, hiji waktu bakal tumanya ka dirina sorangan.”Batur sakitu baleunghar budayana, ari Sunda boga naon?”
“Tah, mun geus kitu, urang Sunda tangtu bakal nyoreang ka tukang,” ceuk teori Aan. Nu matak manehna mroduksi sorangan CVD pantun. Cenah pantun teh seni anu geus dianggap langka. Juru pantunna geus karolot, euweuh nu neruskeun. Mun maranehna geus areuweuh, tangtu seni pantun ge kabawa euweuh. Nu matak geuwat di-VCD-keun bari ngarep-ngarep sugan aya urang Sunda nu meuli.
“Aya ari ayana mah, ngan mun diitung sacara bisnis, nya ... moal jadi daging,” pokna seuri.
Bisa jadi teori Aan salah, da buktina, geus diasong-asong ka unggal jalma, 90% mah gideug da naon cenah pantun, teu nyaho.
“Jaba teu kahartos, jaba pangaosna awis kitu,” ceuk nu ditawaran. Memang Aan sasangkleng ngahargakeunana. VCD teh dijual Rp 50 rebu/2 pct durasi sajam satengah. Mangkaning ceuk jalma, pan di emper ge hiburan mewah kaliber dunya saperti musik Bon Jovi, Metalica, jeung sajabana ukur limarebuan bari kualitas DVD. Ieu gambarna rumeuk (da puguh direkam ku handicam), puluh-puluh rebu.  Hayang untung gede?
“Bisa jadi. Tapi da jajauheun deuih. Nyieun VCD teh di imah ku sorangan. Sakali nyieun tara leuwih ti 50 siki. Genep bulan teu beak. Mangkaning kuring hutang jangji ka juru pantunna,” ceuk Aan.
Kakara aya tiluan juru pantun, Abah Odon ti Kuningan, Nyimas Karnewi ti Subang jeung Ki Atang ti Sumedang. Mideokeun eta juru pantun durasi sajam satengah, Aan ngeupeulan duit masing-masing Rp 250 rebu bari dibibitaan ku jangji, ”Insya Allah, mun VCD janten artos, abdi baris ka dieu deui nambihan honor,” ceuk Aan teu utang-itung gaya royalti.
Lain mulan-malen deui, geus aya taunna, Aan teu nembongkeun irung-irungna acan ka juru pantun anu tiluan teh da sanajan enya aya nu meuli, tapi teu nitih sabulan hiji.
Aya anu mere kamandang, atuh cenah menta bantuan ka pihak-pihak anu sarua baroga tanggung-jawab da mulasara budaya mah lain kawajiban hiji dua jalma. Ceuk Aan, henteu ari dipapay ka saban instansi atawa ka saban jalma jegud nu sohor ngaku cinta Sunda mah, ngan ari nu sipatna nyarayuda teh memang kungsi jeung geus sababaraha kali ngalaman era.
“Nya era ari teu dipercaya mah,” ceuk Aan mesem. Aan nyebutkeun, pikeun nyarayuda teh kudu boga pasaratan. Kahiji jalmana dipercaya, kadua wawuh jeung katilu deukeut. Mun teu kitu, lapur. Mangkaning Aan mah jalmana teu resep sowan.
Ngirim surat ka sababaraha instansi menta dibantuan modal, lolobana surat teu beja teu carita, teu ngajawab arek teu ngajawab moal. Tepi ge biheung deuih.
“Tapi aya ketah anu hormat ka sim kuring bari teu tetelepek hayang wawuh. Nyaeta waktu menta bantuan ka Bank Jabar, tina menta waragad Rp 42 juta, dibere limaratus rebu. Eta mangpaat jang mroduksi VCD sababaraha ratus siki,” ceuk Aan bungah. Tapi ari cita-cita Aan mah gede matak menta duit gede ge. Harita Aan hayang ngadokumentasikeun juru pantun, ti saban kabupaten nu aya di Jabar jeung Banten. Saban kabupaten diwakilan ku hiji juru pantun. Tur sanggeus kitu, produksi VCD-na hayang dibagikeun haratis ka saban sakola anu aya di tatar Jabar jeung Banten sangkan entragan ngora apal naon ari pantun, mun mah dina hiji waktu sakumna juru pantun Sunda geus taya di kieuna. Mun waragadna gede, meureun kualitas produksi ge bisa ditingkatkeun teu jiga nu ayeuna, cukup ku handycam. “Tapi da nyarayuda teh pan kudu puguh pasaratanana, jiga anu tadi ku kuring ditataan. Mun maranehna teu nganggap ka kuring, deuk kumaha sok?” ceuk Aan nutup obrolan. ***  Dadan S